Bara mistök

Loksins kom að því að annar hvor toppurinn í ríkisstjórninni viðurkenndi að stuðningur Íslands við innrásina í Írak hafi verið mistök. Um langa hríð hafa blessaðir mennirnir staðið muldrandi fyrir framan þessar rústir og reynt að halda því fram að þeir sæju ekki eftir neinu. Að ekkert rangt hefði verið gert. Allir sáu að þessi málatilbúnaður -- að Ísland hefði átt erindi með Bandaríkjunum inn í þetta stríðsbrölt -- var hruninn fyrir löngu.

Til eru þeir sem segja að það sé auðvelt að vera vitur eftir á. Sjálfstæðismenn virðast ætla að halda sig við þá línu enn um sinn.  En þetta er undarlegur málflutningur í ljósi þess að svo til allt þjóðfélagið -- ýkjulaust -- reyndi að koma því áliti sínu til skila til stjórnarherranna á sínum tíma að það vildi ekkert með þessa innrás hafa. Þrjóskan var hins vegar svo mikil að þó svo samfélagið hafi nánast farið allt á annan endann út af þessu, þá létu menn sér hreint ekki segjast. 

Skoðanakannanir sýndu að yfir 80% þjóðarinnar voru á móti stuðningi Íslands. Mótmælafundir voru haldnir með reglulegu millibili á Lækjartorgi og víðar. Meira að segja Stjórnarráðið varð fyrir árás manna með málningapensla. Hið merkilega var að Davíð og Halldór -- sem ákváðu þetta að því er virðist upp á sitt einsdæmi -- virtust aldrei ná því hvers vegna andstaðan var svona mikil. Núna þegar þeir hafa báðir þurft að hrökklast frá -- og aðrir ráðamenn annars staðar í heiminum eru í botnlausum vandræðum út af þessu -- held ég að þeir hljóti að hafa lagt saman tvo og tvo og fengið út fjóra. 

Þeir vanmátu hvað það er ríkur þáttur í þjóðarsálinni að vilja ekki styðja styrjaldir. Íslendingar eru að grunni til friðelskandi þjóð sem er stolt af því að hafa engan her. Við hlæjum enn að hugmyndum um íslenska herþjónustu. Þjóðin var klofin út af aðild að hernaðarbandalagi í áratugi. Sáttin sem hafði myndast að lokum var sú, að Íslendingar myndu fara eftir samþykktum Nato og/eða Sameinuðu þjóðanna þegar kæmi að stuðningi við hernaðarumsvif. Þessi sátt var brotin af Halldóri og Davíð.

Einkum og sér í lagi var þetta viðkvæmt í Framsóknarflokknum. Ég held að það sé óhætt að segja að flokkurinn hafi allt frá 1949 byggt sátt um utanríkismál innan sinnan raða á því að Ísland færi ekki lengra en með Nato í mögulegum stuðningi við innrásir. Gömlum og gegnum Framsóknarmönnum hefur því alltaf liðið bölvanlega með þetta klúður. Aldrei hefur nokkur flokkur fyrr eða síðar komist jafnmikið upp á kant við fylgi sitt eins og í þessu máli.  Það fór mestmegnis.

Það er fínt að fá loksins viðurkenninguna upp á borðið um að stuðningur Íslands við Íraksstríðið hafi verið rangur.  Ég veit samt ekki hverju hún breytir. Líklega undirstrikar þetta bara það sem allir vissu, að mjög margir framsóknarmenn studdu þessa innrás gegn eigin samvisku á sínum tíma. Að enginn hafi þorað að segja neitt fyrr en nú er satt að segja dálítið sorglegt. 

En mér finnst líka ágætt að Jón sagði ekki að stuðningurinn hafi verið tæknileg mistök -- eins og sumir hefðu gert -- heldur bara mistök. Punktur. 

Athugasemdir

[Kristján Sig. Kristjánsson (IP-tala skráð) 27.11.2006 kl. 12:24]

Það athugist að mistökin fólust í "röngum forsendum"!! Hver gaf þessar forsendur? Frakkar? Þjóðverjar? Nefnd Sþ. sem hafði rannsakað málið í áratug? Eða greiningardeidd RLS? Allir vissu sem vildu að "forsendur" CIA voru lygi. Að koma svo eftir á þegar búið er að drepa 700000 manns og troða sér saklaus inn í raðir fordæmdra manndrápara eftir á er einsdæmi. Það athugist einnig að HÁ stofnaði íslenskan her til að fylgja þessum plönum eftir án þess að spyrja nokkurn mann. Það var brot á íslenskri hefð frá 1300 og eiðrof íslenskrar þjóðar frá 1944, svívirða á öllu sem unnist hafði til Íslands á alþjóðavettvangi sl. 100 ár að leysa málin með samningum og lögum

[Bragi Einarsson, 27.11.2006 kl. 14:08]

gleymið því ekki að meira að segja bandaríkjamenn eru á þeirri skoðun að innrásin hafi verið mistök. Sjáið bara niðurstöðu þingkosninga í USA!

[Haraldur Ö. Sturluson (IP-tala skráð) 27.11.2006 kl. 16:50]

Ég virði fólk sem viðurkennir mistök. En fólk sem annaðhvort tekur ákvarðanir sem þessar gegn vilja þjóðarinnar og/eða greiðir atkvæði gegn eigin sannfæringu hefur ekkert erindi á þing.

[Eiður Ragnarsson, 28.11.2006 kl. 00:23]

Það er nú erfitt að finna þingmann í dag sem ekki hefur greitt atkvæði gegn sinni sannfæringu held, því miður.

[Finnur Torfi Gunnarsson (IP-tala skráð) 28.11.2006 kl. 09:19]

Enn eina ferðina kemurðu með magnaðan pistil. Ég hlakka til að sjá þig á þingi.